Tolışi Siprişon Ali Şura Dınyo mısılmonon Ğıbonə idi təbrik kardedə:

İslami dinədə muhumə ayinon qıləyni Ğıbonə ide. Həmonə ruj İbrahim Xəlil peyğəmbər (ə) de Xıdo əmri ıştə ahi-imonə iqlə zoə İsmaili Minadə obırney pidəşbe. Xıdo İsmaili əvəzi qıləy ğoç vığandışe. İbrahim həni ıştə zoə ne, ğoçi ğıbon bıredə. Çə vaxtiku ın ənənə mandə bo dınyo insonon. Mısılmononən həminə ruji id kardedən.
Çə hadisə bədiqə Minadə ğıbon obıriyey adət bedə.
Im nuşo doydə ki, xalisə bəndə isbat kardedə ki, çe Xıdo çətinə dəvinonku de səbarzi, de ruşnədimi çıcurə beşe bəbe. Bəroən ımruj bənə şoy-şoyə, idə ruji bə tarıx eqıniyə.
Isətən insonon, mısılmonon bə Xıdo kə bə ziyarət şedən, Minadə ğıbon obıredən. 
De hicri-qəməri təqvimi zilhiccə manqi 10-də (imsor avqustə manqi 22-də) mıqəddəsə Ğıbonə id dəvonedəmon. İdə ruji bəştə məxsus əməlon heste. In mıborəkə bərəkətinə şəvədə əhyo oqətedən, yəni tosə rujobə ibodət-dıvo kardedən.
Ğıbonə idə rujədə  ğusl kardey vocib zınedən. Tosə çoştə vaxti məscidonədə idə nomoj votedən. Çəyo bo ğıbonə qujd hardey bə kə şedən.
Ğıbon obıriyəbə həyvonon pəs, bız, qo, qomuş, dəvə cinsədə bəpe bıbu. Xəşəhəyvon bıbu, noqis nıbu. İsmail ğıboni sıftənə 3 rujədə obıriye bəbe (zilhiccə manqi 10, 11, 12-də )
Ğıbon obıriyə odəm  bəpe mısılmon bıbu, ağılmand, bə həddı-buluğ bırəsi, səfərkeş nıbu, molsoyb, mılkxıvand bıbu.
Ğıbon obıriyə həyvon bə ğiblə oloxtınə bedə. Həyvoni obıriyə məğomədə dıvo handə bedə: “ Əy Xıdo,çekonə ki, ıştə dust İbrahimiku (ə), ıştə həbib Məhəmmədiku (s) ğəbul karde, çımıkuən // çəməkuən ğəbul bıkə ın ğıboni...” 
Çəyo ğıbonbır “Bismillahi Allahu Əkbər” votedə, həyvoni obıredə. Pəs, bız, qo, qomuşi xılxi jəydən, qıy ço qılə rəği bıredən. Dəvə isə bə səpo, çəpə navinə lınqi dəvastedən, xılxə bıno çəxo ejedən, dəvə qınedə bə zəmin, çəyo de ğaydə bıredən. 
Ğıbonə həyvoni qujdi bə 3 vırə baxş kardedən: 1-nə poə bo ğıbonxıvandi mandedə, 2-nə poə bə hamsiyə, bə duston, ğohomon doə bedə. 3-nə poə bo kosibon, fəğıron vığandə bedə. Yolə xıyzon beədə qujdi veyni ıştən oko doy bəzınen.
Əzizə duston, iqidə merdon, xanımə moynon, çəmə həmə xosə id-Ğıbonə id bud bıbo!