14:59 Ivrə çımı vətəne. | |
| Ivrə çımı vətəne. Mıku umut qəmi noy, Rom bo dınyo dimi noy.., Rəğım zirı –zəminoy, Anburim az, putə ne, Ivrə çımı vətəne! Fəron kardən xəyə koy, Ğəd bınəm bə həxi poy, Mərdə zoon səjdəqoy, Conisən bə pentone, Ivrə çımı vətəne! Məsdəm, veyon bə dode: Vəhişt Xıdo icode!, Vəyşte, xose, obode, De kaşton, de dutone, Ivrə çımı vətəne! Sır ədəni, sırdoye, Çı dıjdoye, hırdoye, Bandon qıləy orduye, In məholi ço tone, Ivrə çımı vətəne! Çımı fərə kom heste, Onıkışyə çom heste, Tarıxədəm nom heste, Az i dıyom, mutə ne, Ivrə çımı vətəne! Xıdo peyğom ğandə yo, Muğon, Məzdon handə yo, Zərdusti riz mandə yo, Ə yəştone, ğatone, Ivrə çımı vətəne! Xəlğım bə dınyo peşnə, Çıvrəyku səydə ruşnə, Əmandnim çaş epuşnə, Mışt be sənibətone!, Ivrə çımı vətəne! Ostoro mion çəpə, Qasbu va yo jə şəpə?, I poə ruy bə japə, I poə ruy bı tone, Ivrə çımı vətəne! Nodon sıxan ğandedə, Qah ım dıli kandedə, Tarıx çiçon handedə, Vətən çı oqətone!, Ivrə çımı vətəne! Tarso jimon bə mıjde, Pehandəyış çı rıjde?, Bıznon, ğıyzım ve dıjde, Im qəpım bo hutone, Ivrə çımı vətəne! Bo dışmeni rıkin bə, Bo dustiro ovsin bə, Jıqo nıznon riz qin bə, Bino bəkam otəne, Ivrə çımı vətəne! Fik bıdə bıton, bəton, Bə insoni doydə con, Xos vılinə çimənon, Xaliye, sə sətine, Ivrə çımı vətəne! Ruon şır-şır emandə, Bəton pəpu ehandə, Vanq bə vanqi dəmandə, Dılə boğe, betone, Ivrə çımı vətəne! Bandon sədə bə hıri, Verdı lonə bə bıri, Fikdə qahi bə keri, Mujnə şəhər etəne, Ivrə çımı vətəne! Xıdo jıqo doy ğərol, Bərəkətış pure, bol, Deştə marzon ım məhol, Yolə tole, hitə ne, Ivrə çımı vətəne! Sıftə ofəy azim hest, De bə Mərtyə nezim hest, Popok, Dədə, Həzim hest, Mıku pandı qətə? Ne! Ivrə çımı vətəne! Biləsıvo həmine, Lik – Lankone, nomine, Rizvanşəhre, Nəmine, Ə sə Rəşti bə tone, Ivrə çımı vətəne! Ənzəliku bə vanqe, Mirzə Kuçək bə canqe! De yadon çanqbəçanqe, Pərçəmi peəqətone: Ivrə çımı vətəne! Hardəşbe neçi cəğə, Zulfiğari, Beyqəğə, De Monqoli, de Dığə, Bə canq be, ro botı, ne!_ Ivrə çımı vətəne! B.Veşo. 2017. | |
|
| |
| Total comments: 0 | |